ينام منهو ما يعرف الهموومي

بسم الله الرحمن الرحيم
السلام عليكم ورحمة الله وبركاته
أضع بين أيديكم هذه القصيدة للشاعر الامير محمد الأحمد السديري

جزالة ابياته اجبرتني انقلها لكم :





ينـام مـن هـو مـا يعـرف الهمومـي .. وعيني اليا ناموا حريـب لهـا النـوم

الله يـلــوم الـلــي لـحـالـي يـلـومــي .. لا ساهـر سهـري ولاهـوب مهمـوم

ماهـوب مثلـي يزعجـه كــل يـومـي .. هــم يـلـوج بـداخـل الـصـدر مكـتـوم

لا مـبــدي أســـرار قـلـبـي لـقـومـي .. واللي بسـر الغيـب ماهـوب مفهـوم

آخـاف ابـوح الـسـر تـبـدا الثلـومـي .. وتاقف على مكنون سري هل اللوم

عاهـدت قلبـي مــا يـبـوح العلـومـي .. ولا يـويــق بغـايـتـه كــــل مــذمــوم

بالليـل اساهـر سـاريـات النجـومـي .. والصبـح اعـدي بالنبـا كـل مـزمـوم

أوجـس بقلبـي مثـل حـر السمـومـي .. ولا صفالـي خايـن الـدهـر لــو يــوم

ياسـيـف قــم لـعــل حـظــك يـقـومـي .. ولعل ابوك بساعة الحشـر مرحـوم

الـنــار شـبــه يــاقــوى الـعـزومــي .. وهـات الـدلال وتـرك النـوم لرخـوم

خـابــرك يـالـطـيـب ودود رحــومــي .. قـم سـو مـا يبعـد عنـا كـل شغـمـوم

فنـجـال بــنٍ مــا يحـضـره رخـومـي .. مبهـر مــن بـيـن الأجــواد مقـسـوم

أرواحـنــا بـفــلاك الأيــــام تــومــي .. ولـو يطـول العمـر فـالأجـل محـتـوم

روحي بيد فارض صلاتي وصومـي .. اللـي بحبـل اليسـر ينجـي لمضـيـوم

الـواحـد الـلـي نطلـبـه كـــل يـومــي .. منجي ليوسف عقب ماهوب مظلوم

دنيا الشقا يا سيـف مـا هـي تدومـي .. كــم واحــد فيـهـا مشـيـح ومـنـجـوم

وافـرح اللـي قالـوا تقافـت غيومـي .. على شفا الباطن وهو قبـل ماسـوم

حيثـه مــرب لـكـل وضـحـا ردومــي .. اللي بها زود علـى الطـوق برشـوم

عسـى تعلـه مرهـشـات الوسـومـي .. يمطـر عليهـا الوبـل يـوم بـعـد يــوم

عشـبـه يغـطـي نايـفـات الـحـزومـي .. فيه الزهر فـوق الزماليـق منضـوم

مـخـالـف الـنــوّار غـــاد سـهـومــي .. والعشب من وبل المراهيش كيهوم

فيـه أم سالـم مــن طربـهـا تعـومـي .. تلفح بسمح الريش في كـل مرجـوم

من الطـرب فـي كـل روضٍ تحومـي .. وتقضـي الدنـيـا زغـاريـت وسـجـوم

ان شـافـت الـنــوّار نـبـتـه يـزومــي .. ما سايلت عن حال معطـا ومحـروم